कान्ह्या तुझी मुरली आज ,का साद मजला घालते?
पाव्यातली सुरावली सख्या ,आज काय मजला सांगते ?
फोडुनी मटकी का रे तुझी
तहान नाही भागते?
चोरुनी खावून लोणी-दही
भूक नाही भागते?
का मलाच मुरलीधरा ,तुझी मुरली होऊ वाटते?
पाव्यातली सुरावली सख्या ..........................
पाण्यातली रे मासोळी सख्या
बघ पोहणंही कशी विसरते?
वाहणारी यमुना बघ रे ,
का तिथेच थांबते ?
कोणती रे भूल सख्या ,साऱ्यांना तुझी छ्ळीते?
पाव्यातली सुरावली सख्या ,................
नगरी तुझीच म्हणून का रे
सत्ता तुझीच चालते ?
तुझीच का रे छबी मुकुंदा
गोपिकांना भावते ?
मीरा असो कि आणखी कुणी ,ही राधिका तुला भावते .......
पाव्यातली सुरावली सख्या ...................
कान्हा तू यशोदेचा सख्या
देवकी का तुला पूजिते?
तुझीच माझ्या मनमंदिरी
मूर्ती का रे राहते ?
दूर राहुनी तुझी सख्या रे ,मी चरणधूळ स्पर्शिते ......................
पाव्यातली सुरावली सख्या ,आज काय मजला सांगते ?
कोणत्याही टिप्पण्या नाहीत:
टिप्पणी पोस्ट करा